Yar Arewacin Nijeriya ne kaɗai ƴan TikTok su ke talauci-A Cewar Kungiyar SMAPDA
Kungiyar Wayar da Kai da Cigaban Masu Amfani da Kafafen Sadarwa, SMAPDA, ta bayyana damuwarta game da yadda dimbin masu amfani da manhajar TikTok daga Arewacin Najeriya ke fuskantar talauci, duk da damammaki da dandalin ke bayarwa.
Sharfaddin Bature, wanda ya kafa SMAPDA, ya yi wannan magana a wajen taron wayar da kai na kwanaki biyu, wanda aka gudanar a Kano a yau Juma’a. A cikin jawabin sa, Bature, wanda shi ne Sakataren ƙungiyar, ya nuna rashin jin dadinsa game da yadda wasu masu amfani da TikTok a Arewacin Najeriya ke amfani da manhajar ba bisa ka’ida ba.
Ya bayyana cewa, ko da yake TikTok tana daya daga cikin manhajojin sada zumunta mafi amfani a Najeriya, tare da ƙarin miliyan 23 na masu amfani daga cikin ƙasar, da Arewacin Najeriya na da kimanin miliyan 15, masu amfani da TikTok, a akwai rashin ingantaccen amfani da wannan dandalin a yankin. Wannan rashin inganci na amfani yana haifar da rikice-rikice, rarrabuwar kawuna, da ƙiyayya a tsakanin matasa.
Bature ya bayyana cewa, SMAPDA tana aiki a matsayin mai ba da gudummawa wajen inganta amfani mai kyau da TikTok a Arewa, ta hanyar ƙarfafa matasa da suka yi amfani da dandalin a hanyoyi masu tasiri don ci gaban yankin.
"SMAPDA tana himma wajen wayar da kan matasa kan yadda za su yi amfani da TikTok ta hanyar da za ta kawo cigaba da arziki, maimakon haifar da tashin hankali da rikice-rikice," in ji Bature.
A karshe, Bature ya bayyana cewa wannan taron na wayar da kan jaruman TikTok yana nufin koya musu dabarun da za su taimaka wajen samun arziki ta hanyar amfani da dandalin a hanya mai kyau.
Post by Sa'ed A Sa'ed